Ærbødig hyllest til Ludwig van Beethoven

I 2020 var det 250-år sidan Ludwig van Beethovens vart fødd. Denne konserten presenterer nokre av Beethovens mest kjende (kanskje også ukjende?) verk både i original-versjonar og i improvisert og arrangert form. Det blir kanskje både til og frå Elise, og av måneskinn vil det kanskje denne gongen gro noko spanande.Det er mykje glitrande materiale å ta tak i, hans 5. symfoni er vel eitt av verdas aller mest kjende musikkstykke. Beethoven komponerer eit tema, og etter berre 4 tonar kjenner hele vår sivilisasjon igjen musikken. Det er genialt!
Dette blir ein ærbødig hyllest til Ludwig van Beethoven.

ARVE TELLEFSEN si karriere har teke han til alle europeiske hovudstadar og han har turnert i heile verda. Ved sida av å vere teknisk briljant, er det den unike varmen og vibrerande tonen og den lidenskapelege intensiteten som har gjort han anerkjend og elska over heile verda. Evna til å fengsle og kommunisere med publikum gjer han til ein av verdas fremste fiolinistar.

Han har spelt med verdas leiande orkester og dirigentar, framførd på mange av dei viktige scenene og delteke på ei rekke internasjonale festivalar. Arve Tellefsen har motteke fleire prisar for sine grammofoninnspelingar; gull- og diamant-plater og fleire spelemannprisar. Han har seld over ein halv million CD-ar berre i Noreg, og i 1988 var CDen ”Pan” den mest selde norske CD uansett sjanger. Han har gjort ein stor innsats for nyare norsk musikk, og han har vore ein viktig forkjempar for musikken til Ole Bull.

I 1989 starta han sin eigen Oslo Kammermusikk Festival, som var den fyrste i sitt slag i Noreg. Festivalen er ein enorm suksess og tiltrekkjer seg internasjonale toppartistar.

Saman med Tellefsen kjem pianisten

KJETIL BJERKESTRAND. Bjerkestrand er også komponist, arrangør og plateprodusent. Han har arrangert musikk for artistar som Ray Charles, Dee Dee Bridgewater, Keith Emerson, Ian Hunter, Jon Lord, Ute Lemper, Sissel Kyrkjebø og A-Ha. Som musikar har han delteke på eigne innspelingar og innspelingar med blant andre A-Ha, Ray Charles, Ute Lemper, Ian Hunter, Dance With A Stranger, DumDum Boys, Jonas Fjeld Band, Marius Müller, TNT, Arve Tellefsen, Bobbysocks, Bjørn Eidsvåg, Carola Häggkvist og Dee Dee Bridgewater.
Bjerkestrand har også laga musikk til fleire historiske spill, filmar og TV-seriar, fleire av dei i samarbeid med Magne Furuholmen under navnet Timbersound. Som produsent har ho arbeidd med Anne Grete Preus, A-Ha, Lynni Treekrem, Morten Harket, Sissel Kyrkjebø og Herborg Kråkevik for å nemne nokre.
Bjerkestrand komponerte i 2012 bestillingsverket Memento Mori, som vart urframført under Olavsfestdagene i Trondheim. I 2013 komponerte han musikken til Oslo nye teater og Riksteaterets oppsetnad av Snøkvit. I 2014 var han komponist og hadde det musikalske ansvaret for Peer Gynt på Gålå.
Siden 2010 har K.B. hatt eit tett samarbeid med Keith Emerson og arrangerer hans musikk for symfoniorkester. Likedan har han eit liknande samarbeid med Dhafer Youssef og Dee Dee Bridgewater.