Kunstutstillinga 2024

Me gler oss til å invitera dykk til Kunstutstillinga 2024, med biletkunstnar Anne Hesvik og kalligraf Bas Vlam!

Det vert ei vakker utstilling med pensel og penn, følsom materialitet i dialog med tradisjon og historie –  ei visuelt sterk og stemningsfullt kommuniserande utstilling til refleksjon og ettertanke.

Utstillinga opnar laurdag 11.5 i Ådnesstova (kafébygningen), og står til og med sundag 1.9. Alle verka er til sal.

Bas Vlam – Frå Håvamål

Anne Hesvik – Utdrag frå Landslova

Anne Hesvik vaks opp i Hardanger, og bur i dag i Strandvik. Arbeida hennar byggjer på klassiske malingstradisjonar. Ho arbeider ofte på tre, både i to og tre dimensjonar, og hovedsakeleg i olje. Ho nyttar mykje ornament, og lagar si eiga måling. Til Agatunet har ho og med verk som er direkte knytt til Landslova av 1274, kong Magnus Lagabøte si store lovbok som i år er 750 år – noko som markarast over heile landet.

Bas Vlam kjem frå Nederland, men bur i dag på Askøy utanfor Bergen. Han har arbeidd som kalligraf i mange år, og driv mykje kurs og føredrag i mellom anna kalligrafi og føredrag. Han arbeider mykje med både skrifttyper og tekstar fra mellomalderen og lenger attende, og er og kalligrafen bak replikaen av Bleiediplomet som me har i tunet – det eldste fullstendige rettsdokumentet i Noreg, gjeve her på Aga i 1293. Til Agatunet kjem Bas me vakre arbeider med utgangspunkt i mellom anna Håvamål og Landslova av 1274.

Anne Hesvik

Bas Vlam