Lansering av boka Attrå
Om arrangementet
Lansering av boka ATTRÅ – om Lars Korff Lofthus sin kunst
Samtale mellom kunstnaren og Tora Døskeland
Laurdag 21. september er det Hardanger-lansering av boka i Agatunet. Der møter kunstnaren forfattar, litteraturvitar og formidlar Tora Døskeland, busett i Grimo.
Biletkunstnaren Lars Korff Lofthus frå Lofthus, har den siste tida hausta anerkjenning for sin måte å presentere folkekultur, natur og erotikk. No kjem boka ATTRÅ om hans kunstnarskap.
Boka er ein presentasjon av kunstnarskapen til Lars, med særleg fokus på dei fire siste separatutstillingane hans, blant anna undersøkt av forskar og sosiolog Merete Jonvik, og meir subjektivt av kulturskribent, kritikar og kurator Bjørn Hatterud. Boka gir også lesaren innblikk i prosessen bak bileta.
Arrangementet er gratis, men meld din ankomst ved å kjøpe gratisbillett i lenka under.
Lars Korff Lofthus sine verk har denne sommaren vore stilt ut i Kristiansand Kunsthall.
Lars Korff Lofthus er oppvaksen på Lofthus og utdanna ved Kunsthøgskulen i Bergen, avd. Kunstakademiet, Det kongelige Danske Kunstakademi og Nordiska Konstskolan i Kokkola, Finland. Arbeida hans er kjøpt inn av blant anna Nasjonalmuseet, Bergen Kunstmuseum KODE, Oslo kommune, Equinor og Universitetet i Agder. Kunstnaren veksler mellom bustad i Bergen og Hardanger, der han også har arbeidsplass og atelier i det tidlegare fruktlageret på Børve.
Arrangementet er eit samarbeid mellom Agatunet og Hardanger kunstlag.
Foto maleri:
Interiør (Rambergstova) 2024
Akryl og pigment på lerret 190 x 320 cm
foto: Bent René Synnevåg