Utandørs

Vandre i tunet

Det er ei fin oppleving å vandre rundt i Agatunet. Ein kan forestille seg korleis det var den gongen det var folk – mange folk – i husa, og livet vart levd her, tett på kvarandre, til kvardags og fest.

Dei eldste som lever i bygda i dag, som vaks opp i Agatunet, kan fortelja om eit godt og trygt liv, alltid nokon å vera i lag med, alltid ein hjelpande hand, og om folk som budde så tett at dei ikkje fann det verdt å ryke uklår. Dei fortel at om ein ikkje likte middagen heime en dag, var det råd å leggja turen innom eit anna hus og sjå om ein ikkje hadde betre lukka der. Det var plass rundt bordet.

I Agatunet veks det fleire sortar historiske roser kring husa. Her veks gamle frukttre, med kirsebær, eple, pære og plommesortar som no har vorte sjeldne. Dei gamle trea ser ganske annleis ut enn den moderne plantinga.

Me har ein liten urtehage som vart anlagd våren 2005. HKH Dronning Sonja kom til Agatunet og planta kvann saman med Det Norske Hageselskap. Kvann har ein lang historie i Noreg. Allereie frå sagatida har me opplysningar om bruken. Frå 1500-tallet spelar planten ein stor rolle i folke- og skulemedisinen. Kvann vart ofte dyrka i egne kvanngardar ved tunet. I urtehagen veks det og andre historiske mat – og medisinplantar. Mange av desse vert nytta i kaféen i Agatunet, og når me serverar gjestene våre i dei freda husa.

Dronning Sonja har og planta eit epletre i tunet, eit Gravensteintre som står utanfor Isaksstova. Den vart sett ned i 1992, til minne om Johannes Pedersen Aga, som planta det fyrste Gravensteinspletreet i Hardanger og Noreg i 1792. Ein bauta var reist i lag med treet, som me no omtalar som Dronningapalen.

Me har ein imponerande gullregn – Laburnum anagyroides – utanfor Sveinstova bak i tunet. Det blømer i slutten av mai eller byrja på juni, og er eit overveldande vakkert skue. Treet vart planta i 1933 av Alfred Aga, som budde i Sveinsstova. Han fekk ein avleggar frå hotellhagen på Ullensvang. Om den er blant landets eldste gullregntrær veit me ikkje, men ein svært begeistra botaniker me hadde på vitjing var heilt klar på at den iallefall måtte vera blant dei største.

 

Kontakt
Besøksadresse: 5776 Nå
Postadresse: Museumsvegen 36, 5778 Utne

Tlf: 474 79 884
E-post: agatunet@hvm.museum.no
Nyhendebrev
Meld deg på nyhendebrevet vårt og motta informasjon om det som skjer ved Hardanger folkemuseum!
Opningstider
6.mai - 1. sept. 2019:
Kl 10 - 17 alle dagar
Ope for grupper og andre besøkande etter avtale heile året
X